Një rast i pazakontë është shënuar pasditen e së dielës në rrugën Lole Ribara në Mitrovicën e Veriut, ku një i mitur ka dëmtuar pasurinë e një qytetareje gjatë një përplasjeje verbale, duke pësuar edhe lëndime në trup.
Më 03 gusht 2025, rreth orës 17:00, Policia është njoftuar për një konflikt në atë lokacion dhe menjëherë ka ndërhyrë, duke shoqëruar katër persona në Stacionin Policor në Mitrovicë-Veri.
Gjatë fjalosjes mes palëve, i dyshuari S.E rreth 14-vjeçar, dyshohet se ka thyer xhamin e derës së një dhome, që i përkiste ankueses L. B. rreth 25-vjeçar. Si pasojë e veprimit, i mituri është vetëlënduar dhe ka marrë trajtimin e nevojshëm mjekësor.
Palët janë intervistuar, ndërsa i mituri është marrë në pyetje në praninë e avokatit. Pas konsultimit të hetuesit me prokurorin për të mitur, rasti është cilësuar si “Asgjësim apo dëmtim i pasurisë”, ndërsa i dyshuari është liruar në procedurë të rregullt.
Hetimet rreth rrethanave të ngjarjes janë ende në zhvillim.
