Liverpool ka bërë një përpjekje serioze për të transferuar sulmuesin suedez Alexander Isak, duke ofruar një pako totale prej 120 milionë eurosh përfshirë bonuset. Megjithatë, Newcastle e ka refuzuar menjëherë ofertën, duke bërë të qartë se nuk janë të gatshëm të hapin bisedimet pa gjetur më parë një zëvendësues të denjë.
Pavarësisht kësaj, Isak ka shprehur hapur dëshirën e tij për t’u bashkuar me “The Reds”. Sulmuesi i talentuar, i cili ka spikatur me paraqitjet e tij në Premier League, ka insistuar pranë drejtuesve të Newcastle për t’i lejuar largimin drejt Anfield.
Megjithatë, situata mbetet e komplikuar. Burime pranë klubit anglez bëjnë me dije se asgjë nuk është e garantuar në këtë fazë, pasi Newcastle nuk është e gatshme të rrezikojë strukturën e skuadrës pa një plan të qartë zëvendësimi.
Saga rreth të ardhmes së Isak pritet të vazhdojë gjatë ditëve në vijim, ndërsa Liverpool mbetet në pritje, i gatshëm për të përfituar nëse dera hapet.
