Agjencia e OKB-së për refugjatët palestinezë (UNRWA) tha të enjten se më shumë se 61 milion ton mbeturina mbulojnë Rripin e Gazës si rezultat i më shumë se dy viteve të luftës së Izraelit.
“Lagje të tëra janë fshirë dhe familjet kërkojnë në rrënoja për ujë, për strehim”, tha UNRWA në kompaninë amerikane të mediave sociale X.
Agjencia theksoi se misioni i saj humanitar dhe ndihma shpëtimtare për popullin palestinez vazhdon në Gaza pavarësisht bllokadës së vazhdueshme izraelite dhe kufizimeve mbi stoqet e ndihmës së UNRWA-së.
Sipas Komisionerit të Përgjithshëm të UNRWA-së, Philippe Lazzarini, agjencia ka ilaçe, furnizime thelbësore dhe një sasi të mjaftueshme ushqimi për tre muajt e ardhshëm për të gjithë popullsinë e Gazës.
Në tetor 2024, parlamenti izraelit, Knesset, votoi në favor të bllokimit të operacioneve të UNRWA-së në Bregun Perëndimor dhe Gazën e pushtuar për shkak të përfshirjes së supozuar të stafit të saj në sulmet e grupit palestinez Hamas më 7 tetor 2023.
Por të mërkurën, Gjykata Ndërkombëtare e Drejtësisë hodhi poshtë pretendimet e Izraelit, duke thënë se “Izraeli nuk i ka mbështetur pretendimet e tij se një pjesë e konsiderueshme e punonjësve të UNRWA-së janë anëtarë të Hamasit” ose ishin të përfshirë në sulme.
Gjykata vendosi gjithashtu se Izraeli është i detyruar sipas Konventës së Gjenevës të bjerë dakord dhe të lehtësojë skemat e ndihmës të ofruara nga shtetet e treta dhe grupet humanitare të paanshme, duke përfshirë UNRWA-në dhe Komitetin Ndërkombëtar të Kryqit të Kuq (ICRC), për të siguruar që ndihma e mjaftueshme të arrijë në Rripin e Gazës.
Që nga tetori 2023, lufta gjenocidale e Izraelit ka vrarë mbi 68,000 njerëz dhe ka plagosur më shumë se 170,000, sipas Ministrisë së Shëndetësisë së Gazës.
Një marrëveshje armëpushimi hyri në fuqi më 10 tetor në Gaza, bazuar në një plan me faza të paraqitur nga Presidenti i ShBA-së Donald Trump.
