Aleanca për Ardhmërinë e Kosovës (AAK) ka dalë fituese në zgjedhjet lokale në komunën e Gjakovës, sipas rezultateve preliminare të publikuara nga Komisioni Qendror i Zgjedhjeve (KQZ).
Sipas të dhënave nga 146 vendvotime të përpunuara (100%), kandidati i AAK-së, Ardian Gjini ka marrë 56.03% të votave, që përkthehet në 17,024 vota.
Ndërkaq, kandidati i Lëvizjes Vetëvendosje, Ardian Gola, ka siguruar 43.97%, ose 13,362 vota.
Nga 121,821 qytetarë me të drejtë vote, kanë votuar 30,386, që përbën një pjesëmarrje prej 24.94%.
Rezultatet e publikuara janë paraprake dhe nuk përfshijnë votat me kusht, ato të personave me nevoja të veçanta dhe votimin përmes postës.
Fitorja e Ardian Gjinit i siguron AAK-së edhe një mandat tjetër në krye të komunës së Gjakovës, duke konfirmuar mbështetjen e vazhdueshme që kjo parti gëzon në këtë komunë të Dukagjinit.
