Inflacioni në SHBA u përshpejtua edhe në muajin qershor, me rritje më të dukshme të çmimeve të ushqimeve dhe energjisë elektrike, ndërsa çmimet e benzinës ranë në mënyrë më të butë, tregojnë të dhënat nga Ministria e Punës.
Çmimet e konsumit në qershor ishin 2.7 për qind më të larta krahasuar me të njëjtin muaj të vitit të kaluar, sipas llogaritjeve të ministrisë. Në maj, ato ishin rritur me 2.4 për qind, duke sinjalizuar një përshpejtim të rritjes për herë të parë që nga fillimi i vitit.
Kur përjashtohen energjia dhe ushqimet, çmimet në qershor ishin 2.9 për qind më të larta se në të njëjtin muaj të vitit të kaluar. Në maj, inflacioni bazë ishte 2.8 për qind, po aq sa edhe në dy muajt paraprakë.
Çmimet e benzinës ranë në qershor për 8.3 për qind, në mënyrë më të butë se në maj kur kishin rënë për 12 për qind krahasuar me një vit më parë.
Gazi për përdorim shtëpiak u shtrenjtuar për 14.2 për qind, pak më pak se në muajin paraprak. Ndërsa energjia elektrike u rrit ndjeshëm me 5.8 për qind, krahasuar me 4.5 për qind në maj.
Çmimet e ushqimeve u rritën për 2.4 për qind, duke sinjalizuar një rritje më të fortë se në maj. Çmimet e automjeteve të reja mbetën kryesisht të pandryshuara, ashtu si edhe në maj.
Krahasimi mujor tregon një rritje të çmimeve prej 0.3 për qind në qershor, trefish më e fuqishme se në maj.
Çmimet e benzinës u rritën me 1.0 për qind në krahasim me majin, kur kishin rënë për 2.6 për qind. Gazi u shtrenjtuar për 0.5 për qind krahasuar me majin, kur ishte përmirësuar për 1.0 për qind. Edhe energjia elektrike u rrit për 1.0 për qind, njësoj si në maj. Ushqimet u shtrenjtuan për 0.3 për qind, po aq sa në maj. Çmimet e vezëve ranë përsëri me 7.4 për qind në bazë mujore, më shumë se në maj, duke reflektuar normalizimin e furnizimit pas epidemisë së gripit të shpendëve.
Kur përjashtohen energjia dhe ushqimet, inflacioni bazë ishte 0.2 për qind, dy herë më i lartë se në maj.
Çmimet e automjeteve të reja ranë për 0.3 për qind në qershor në krahasim me muajin paraprak, sipas llogaritjeve të ministrisë.
