Të paktën 11 palestinezë, përfshirë një grua shtatzënë dhe një fëmijë, janë vrarë nga sulmet e reja izraelite në Rripin e Gazës, njoftuan burime mjekësore.
Sipas burimeve mjekësore, një palestinez u vra dhe disa të tjerë u plagosën nga zjarri izraelit në kampin e refugjatëve Shati në qytetin e Gazës.
Që nga e marta në mëngjes, ushtria izraelite ka bombarduar kampin e refugjatëve, ndërkohë që ka kryer edhe sulme ajrore në lagjen jugore Al-Sabra.
Automjetet ushtarake izraelite u tërhoqën nga rruga Al-Jala pasi kishin vendosur trupa të hënën në mbrëmje në një nyje kyçe që lidh veriun me jugun e qytetit, rrugë e përdorur nga civilët dhe ekipet mjekësore, sipas një korrespondenti të Anadolu.
Një grua palestineze dhe gjashtë djemtë e saj u vranë, ndërsa shumë të tjerë u plagosën nga një sulm izraelit mbi një shtëpi në perëndim të Deir al-Balahut, në Gaza qendrore.
Ushtria izraelite goditi gjithashtu një tjetër shtëpi në kampin e refugjatëve Nuseirat, duke plagosur disa civilë.
Një shtëpi tjetër e një familjeje palestineze u godit nga artileria izraelite në kampin e refugjatëve Bureij. Nuk ka ende informacion për viktima.
Në jug të Rripit të Gazës, një burrë, gruaja e tij shtatzënë dhe fëmija i tyre u vranë kur ushtria izraelite goditi një tendë që strehonte civilë të zhvendosur në zonën Al-Mawasi të Khan Younis-it.
